Wiehnacht

Wiehnacht, is dat all wedder so wiet? Süht so ut. Överall lücht de Dannenbööm döör de Fenster. Usen hebbt wi ok all opstellt un schmückt.
Wiehnachtsstimmung, hebbt wi de ok all? Wat is dat noch? Allns glitzert in de Stadt. Överall hört man Wiehnachtsleeder, de een in de richtige Stimmung bringen schölt. De richtige Stimmung för ... för wat? För de Wiehnacht? Nee, för dat Inkööpen. Man düt Johr is dat anners. Keen Trubel in de Stadt, ok keen Wiehnachtsmarkt, keen Drängeln an'n Glöhwienstand. Weer dat wohl de richtige Stimmung, op den Wiehnachtsmarkt? Nee, dor geiht dat ok wedder üm Glitzer un Konsum.
Schull Wiehnachten nicht besinnlich sien? Man op wat schölt wi uns besinnen? Viellicht schulln we dor mol över nohdenken. Joh, viellicht mol in Roh doröver nohdenken, wat würklich wichtig för uns is. In Roh, joh, ohn all de Hektik. Is dat nich schön, dat man ok mol ohn Hektik döör de Straaten gahn kann? Eenfach mol'n beeten nohdenken un sich över den lüften Sünnstrohl freun, de bi dat kohle Wedder döör de Bööm oder döör de Hüüs schient. Mutt jümmer allns noch gröter un noch gauer gahn? Viellicht hölpt uns düt Johr jo mol, 'n beeten rünner to kaam. Uns op Wiehnachten to freun, blots wiel dat Wiehnacht is.
Ick wünsch ju een ruhige un besinnliche Wiehnachtstied.
Reimer Hebbeln